Breiðavík 16, Efstaleiti, Dalbraut 16, Borgartún 5 og Sætún 6, Gjaldskyld bílastæði, Aðalskipulag Reykjavíkur, Elliðavatnsblettur 14, Kirkjusandur 1-5, Kringlan, Vesturhöfnin, Klapparstígur 35A, Miklabraut/Rauðarárstígur, Skúlagata 17, Seljahverfi-Fálkhóll, Spöng, Tröllaborgir 20, Bogfimivöllur, lóðarumsókn Íþróttafélags fatlaðra, Þingás 8,

Skipulags- og umferðarnefnd

21. fundur 1996
Ár 1996, mánudaginn 7. október kl. 09:30, var haldinn 21. fundur skipulagsnefndar í Borgartúni 3, 4. hæð. Þessir sátu fundinn: Guðrún Ágústsdóttir, Guðrún Jónsdóttir, Gunnar Jóhann Birgisson og Óskar Bergsson. Fundarritari var Ágúst
Þetta gerðist:

Breiðavík 16, lóðarstækkun, nýbygging
Lagt fram bréf borgarstjóra f.h. borgarráðs um samþykkt borgarráðs 24.09.96 á bókun skipulagsnefndar frá 23.09.96, um skiptingu lóðar að Breiðavík 14-18.


Efstaleiti, dreifistöð
Lagt fram bréf deildarstjóra áætlanadeildar Rafmagnsveitu Reykjavíkur, dags. 10.09.96, varðandi heimild til að reisa dreifistöð við Efstaleiti, samkv. meðfylgjandi uppdrætti. Einnig lögð fram tillaga Borgarskipulags, dags. 04.10.96, um breytta staðsetningu.
Samþykkt.
Dalbraut 16, íbúðir aldraðra
Lögð fram tillaga Borgarskipulags að skilmálum fyrir lóð aldraðra að Dalbraut 16, dags. 03.10.96.

Borgarskipulagi falið að kynna tillöguna fyrir nágrönnum að fenginni afstöðu félagsmálaráðs.
Borgartún 5 og Sætún 6, ofanábygging og sameining lóða
Lagt fram bréf byggingarfulltrúa, f.h. byggingarnefndar, dags. 13.09.96, vegna fyrirspurnar Vegagerðarinnar um leyfi til að sameina lóðirnar Borgartún 5 og Sætún 6 og byggja tvær hæðir ofan á hús nr. 5 við Borgartún, samkv. uppdr. Tækniþjónustunnar s.f., dags. í júlí 1996.
Skipulagsnefnd samþykkir sameiningu lóðanna Borgartún 5 og Sætún 6, en frestar málinu að öðru leyti.
Gjaldskyld bílastæði, miðborg
Lagðar fram reglur um stærðir og gjöld bílastæða, ásamt greinum úr byggingar- og skipulagsreglugerðum.


Aðalskipulag Reykjavíkur, staða vinnu
Rætt um framvindu vinnu við Aðalskipulag Reykjavíkur.


Elliðavatnsblettur 14, nýbygging
Lagt fram að nýju bréf byggingarfulltrúa f.h. byggingarnefndar, dags. 9.8.96, varðandi viðbyggingu við bústað að Elliðavatnsbletti 14, samkv. uppdr., dags. í janúar 1992. Einnig lögð fram bókun heilbrigðisnefndar frá 20.09.96.

Skipulagsnefnd fellst ekki á erindið.
Kirkjusandur 1-5, ný tillaga, breytt aðalskipulag og deiliskipulag
Lagt fram til kynningar afrit af erindi Ármannsfells, dags. 20.09.96, um uppbyggingu á Kirkjusandi 1-5 til heilbrigðisnefndar Reykjavíkur, ásamt uppdráttum Teiknistofunnar Óðinstorgi, dags. 13.09.96 og bókun heilbrigðisnefndar, dags. 20.09.96. Einnig lögð fram ný tillaga Teiknistofunnar Óðinstorgi, dags. 04.10.96 og breytt tillaga að staðfestu deiliskipulagi við Laugarnesveg 89, dags. 4.10.96.


Skipulagsnefnd samþykkir deiliskipulagstillögur dags. 4.10.´96 með 2 atkvæðum gegn 1 ( Guðrún Jónsdóttir á móti, Guðrún Zöega og Gunnar Jóh. Birgisson sátu hjá). Samþykktin er gerð með fyrirvara um formlegt samþykki heilbrigðisnefndar varðandi hljóðvist.

Skipulagsnefnd samþykkir með 2 atkvæðum gegn 1 breytta landnotkun á lóðinni nr. 1-5 við Kirkjusand úr iðnanaðar- og athafnasvæði í íbúðarsvæði. (Guðrún Jónsdóttir greiddi atkv. á móti, Guðrún Zöega og Gunnar Jóh. Birgisson sátu hjá).

Skipulagsnefnd samþykkir með 2 atkv. gegn 1 erindi Ármannsfells hf. og tillögu Teiknistofunnar Óðinstorgi dags. 4.10.´96 (Guðrún Jónsdóttir greiddi atkv. á móti Guðrún Zöega og Gunnar Jóh. Birgisson sátu hjá). Jafnframt var gerð svofelld bókun. "Samþykkt þessi er gerð í ljósi þess að starfsemi við reykingu matvæla á aðliggjandi lóð verði lögð af eða verði breytt þannig að skilyrði heilbrigðiseftirlits verði uppfyllt"

Skipulagsnefnd samþykkir með 2 samhljóða atkv. umsögn Borgarskipulags dags. 24.07.´96 um athugasemdir nágranna, sem bárust eftir auglýsingu skipulagstillagna og áréttar jafnframt að frá því að tillögurnar voru auglýstar hefur íbúðum verið fækkað. (Guðrún Jónsdóttir, Guðrún Zöega og Gunnar Jóh. Birgisson sátu hjá).

Guðrún Ágústsdóttir og Guðrún Ögmundsdóttir óskuðu bókað:
"Í samþykktri deiliskipulagstillögu felst að skipulagsnefnd heimilar fyrir sitt leyti að byggðar verði þrjár íbúðablokkir á lóðinni, tvær 6 hæða og ein 5 hæða, en byggingarrétthafi er Ármannsfell hf.

Rökin sem að baki búa eru:
- Í fyrsta lagi er það mun vinsamlegra gagnvart þeirri byggð sem fyrir er á svæðinu að þarna komi íbúðabyggð en iðnaðarbyggingar.
- Í öðru lagi hefur tillagan í för með sér heldur minni útsýnisskerðingu heldur en áður staðfest deiliskipulag frá 1990 gerði ráð fyrir. Skv. því var heimilt að reisa allt að 14,3 metra hátt samfellt stórhýsi á lóðinni.
- Í þriðja lagi bætir það ásýnd borgarinnar að auka íbúðabyggð meðfram strandlengjunni í stað iðnaðaruppbyggingar.
- Í fjórða lagi styrkir íbúðabyggð á þessum stað hverfið og innborgina í heild og þétting byggðar stuðlar að minni bifreiðaakstri og fellur að meginmarkmiðum núverandi aðalskipulagsvinnu um bætt umhverfi og minni umferð einkabíla.

Ennfremur skal bent á:
· Útreikningar á hljóðstigi miðast við hávaða frá áætlaðri umferð árið 2016 ef spár um umferðaraukningu ganga eftir.
· Ef og þegar byggð verður hljóðmön við Listaháskóla Íslands mun hljóðstig utan við vegg húsanna á Kirkjusandi lækka um allt að tvö desibel að mati Hollustuverndar ríkisins.
· Að byggðar verða íbúðir á svæðinu með mun fullkomnari hljóðvörnum en áður hefur þekkst.
· Samkvæmt mengunarvarnarreglugerð frá 1994 eru gerðar meiri kröfur en áður þekktist um hljóðvist í nýjum húsum í hinum grónu hverfum borgarinnar. Í fyrstu tillögum Ármannsfells, þar sem gert var ráð fyrir 6, 7 og 9 hæða húsum, náði hljóðstigið utan við vegg allt að 70 desibelum eins og heimilt væri ef um endurnýjun eldri byggðar væri að ræða.
· Borgaryfirvöld hafa skilgreint svæðið sem nýbyggingasvæði og felur það í sér að gerðar eru kröfur um betri hljóðvist en þegar um endurbyggingarsvæði er að ræða. (Samkvæmt þeim reglum sem gilda um endurbyggingarsvæði hefði hljóðstig fyrir utan glugga í helmingi íveruherbergja mátt vera allt að 70 db (A).)
· Sú skipulagstillaga sem nú liggur fyrir felur í sér að komið er verulega til móts við athugasemdir og ábendingar íbúa."

Guðrún Jónsdóttir óskaði bókað:
"Ég hlýt að harma þá ákvörðun , sem hér er tekin vegna þess að hún þjónar eingöngu þröngum sérhagsmunum á kostnað hagsmuna almennings í borginni.
Með samþykkt heilbrigðisnefndar um að heimila frávik frá hávaðaviðmiðun er búið að skapa fordæmi , sem leiðir til þess að héðan í frá er ekki hægt að miða við lögboðnar reglur um hljóðstig í nýbyggð. Þar með er dregið úr þeim gæðakröfum sem gerðar eru til nýs íbúðarhúsnæðis í Reykjavík. Frávikið, sem samþykkt var, leyfir nær fjórföldun á leyfilegu hljóðstigi við húsvegg í nýrri íbúðarbyggð, sem er mikil hækkun. Þótt eingöngu sé miðað við umferðarmagn árið 2016 eða 27.000 bíla á sólarhring en ekki spána 2030 sem gerir ráð fyrir 32.000 bílum á sólarhring eins og eðlilegra væri miðað við líftíma bygginga.
Þá þykir mér ábyrgðarhlutur að þrengja helgunarsvæði Sæbrautar með þeim hætti sem hér var gert. Sæbraut er meginumferðaræð í Reykjavík og gegnir vaxandi hlutverki sem slík. Stórfé hefur verið varið til þessarar gatnagerðar. Sá hljóðtálmi (veggur) sem hér stendur til að reisa er einungis í 4m fjarlægð frá götubrún og gengur inn á núverandi helgunarsvæði Sæbrautar. Miðað við það umferðarmagn sem um götuna fer og mun fara í framtíðinni (32.000 bílar á sólarhring árið 2030) er þessi fjarlægð mjög lítil og væri trúlega nær lagi að tala um 10-15m fjarlægð frá götubrún að hljóðtálma. Fyrir því eru m.a. umferðaröryggisleg rök. Þá koma einnig til sjónarmið er snerta snjómokstur og hreinsun á götunni. Í þriðja lagi er veggur sá um 6m á hæð (samsvarar tveggja hæða húsi) sem menn hyggjast reisa þarna ekki augnayndi og í raun óásættanlegur á þessum stað að mínu mati. Ekki kæmi heldur á óvart þótt umhirða og viðhald mannvirkisins lenti á borgarsjóði er tímar líða. Þótt húsin hafi lækkað frá fyrri tillögum og grunnmyndir breyst get ég ekki samþykkt fyrirliggjandi tillögu. Rökin eru einkum þau sem ég hef tíundað hér að framan."

Fulltrúar Sjálfstæðisflokks í Skipulagsnefnd óskuðu bókað:
"Fljótfærni og vandræðagangur meirihluta borgarstjórnar í þessu máli hefur verið með eindæmum. Graftrarleyfi var gefið út hinn 4. júní sl. eða mánuði áður en sá frestur rann út sem íbúar hverfisins og aðrir höfðu til þess að skila athugasemdum við breytta landnotkun og nýtt deiliskipulag á svæðinu. Þetta var gert án þess að fullnægjandi upplýsingar um hávaðamengun og aðra þætti málsins lægju fyrir. Síðar kom í ljós að hljóðstig er yfir þeim mörkum sem fram eru sett í mengunarvarnarreglugerð. Málið hefur nú í margar vikur velkst um borgarkerfið og meirihlutanum hefur hingað til ekki tekist að finna á því viðunandi lausn. Ljóst er að forystumenn R-listans gáfu verktakanum í upphafi loforð um að málið fengi jákvæða afgreiðslu og skýrir það vandræðagang þeirra. Með hliðsjón af vinnubrögðum meirihlutans í málinu og með hliðsjón af þeim breytingum sem verktakinn hefur látið gera á teikningum húsanna á hann, þ.e. verktakinn sér nokkrar málsbætur. Í ljósi þess munum við ekki leggjast gegn afgreiðslu málsins og sitjum hjá".

Guðrún Ágústdóttir og Guðrún Ögmundsdóttir óskuðu bókað:
"Vísað er á bug fullyrðingum um fljótfærni og vandræðagang í máli þessu. Fá skipulagsmál hafa fengið jafn vandaða og nákvæma umfjöllun innan borgarkerfisins og einmitt þetta mál. Í bókuninni kemur fram sá misskilningur að Reykjavíkurborg beri að finna viðunandi lausnir. Það er hlutverk umsækjandans að skila inn tillögum til nefndarinnar í samræmi við lög og reglugerðir, sem þá tekur málið til faglegrar afgreiðslu. Minnihlutinn hefur átt fulla aðild að málinu allan tímann, en kýs að nota þetta mál til að fara í pólitískan skollaleik. Það er þeirra mál"

Fulltrúar Sjálfstæðisflokks í skipulagsnefnd óskuðu bókað: "Allt frá því að byggingarverktakanum var gefið graftrarleyfi hefur meirhluti borgarstjórnar borið vissa ábyrgð á málinu. Með veitingu leyfisins í samráði við borgarstjóra og loforðum ýmissa fulltrúa meirihlutans var verktakanum gefið fyrirheit sem meirihlutinn hefur átt í vandræðum með að standa við. Enda hefur lengi verið leitað að lausn, sem meirihlutinn getur sætt sig við, án árangurs. Það er ekki pólitískur skollaleikur að gagnrýna vinnubrögð sem fela það í sér m.a. að graftrarleyfi sé gefið út áður en athugasemdafrestur rennur út. Það er ekki pólitískur skollaleikur að hafa áhyggjur af því að endanlegar tillögur brjóti gegn ákvæðum mengurnarvarnarreglugerðar um hljóðmengun"

Guðrún Ágústsdóttir og Guðrún Ögmundsdóttir óskuðu bókað: "Í bókun fulltrúa Sjálfstæðisflokksins eru fullyrðingar sem eiga ekki við rök að styðjast og eru í besta falli tilgátur. Þeim er vísað á bug"

Formaður skipulagsnefndar lagði fram svofellda tillögu:
"Skipulagsnefnd beinir því til borgarráðs að óskað verði eftir viðræðum við ráðherra umhverfismála um framfylgd reglugerðarákvæða um hljóðvist" Tillagan var samþykkt samhljóða.
Kringlan, göngubrú
Lagt fram bréf Einars I. Halldórssonar, f.h. Húsfélags Kringlunnar, f.h. Rekstrarfélags Borgarkringlunnar og f.h. Sjóvá-Almennra hf., dags. 27.09.96 og bréf Stefáns H. Stefánssonar f.h Húss Verslunarinnar, varðandi göngubrú yfir Kringlugötu, samkv. uppdr. Ingimundar Sveinssonar, dags. í ágúst 1996.
Samþykkt.

Vesturhöfnin, umferðarskipulag
Lagt fram bréf Bergs Þorleifssonar, f.h. Reykjavíkurhafnar, dags. 25.09.96, varðandi deiliskipulag og skilmála af afmörkuðum reit í Vesturhöfn, samkv. uppdr. arkitekta Gunnars og Reynis sf., dags. 18.09.96.

Samþykkt.
Klapparstígur 35A, viðbygging
Lagt fram að nýju bréf frá Gerpi h.f., dags. 20.09.96, varðandi uppbyggingu á lóðinni Laugavegur 24B. Ennfremur lagðir fram uppdr. Arkþings, dags. í ágúst 1996.

Samþykkt.
Miklabraut/Rauðarárstígur, lokun, færsla bílastæða
Lagt fram bréf Ólafs Bjarnasonar, f.h. borgarverkfr., dags. 03.10.96 og bréf Gunnars Inga Ragnarssonar, verkfr., dags. 23.09.96, varðandi tillögu að lokun Rauðarárstígs og færslu bílastæða úr miðeyju Miklubrautar. samkv. uppdr. Vinnust. Þverá, dags. 26.08.96.
Frestað. Kynna skal tillöguna fyrir hagsmunaaðilum.
Skúlagata 17, breyting á deiliskipulagi
Lagt fram að nýju erindi teiknist. Úti og inni um uppbyggingu lóðarinnar Skúlagötu 17, breyting á staðfestu deiliskipulagi samkv. uppdr. dags. í ágúst 1996.

Skipulagsnefnd samþykkir tillöguna og leggur til við borgarráð að óskað verði eftir breytingu á staðfestu deiliskipulagi á lóðinni skv. 3. og 4. mgr. 19. gr. skipulagslaga.
Seljahverfi-Fálkhóll, bílastæði
Lögð fram að nýju greinargerð byggingarfulltrúa, dags. í ágúst 1996 um bílastæðamál á Fálkhóli í Seljahverfi. Einnig lögð fram tillaga Borgarskipulags að fyrirkomulagi bílastæða, dags. 03.10.96.

Skipulagsnefnd samþykkir tillöguna fyrir sitt leyti og felur Borgarskipulagi frekari útfærslu hennar. Engin afstaða er tekin til þess, hver beri kostnað af gerð bílastæðanna.
Spöng, skipulag
Lagt fram að nýju bréf borgarstjóra, dags. 28.08.96 ásamt bréfi skrifst.stj. borgarverkfræðings, dags. 02.08.96. Einnig lagðir fram uppdr. Hrafnkels Thorlacius, dags. 21.08.96, sem voru í kynningu til 26. sept. 1996.

Samþykkt. Engar athugasemdir bárust.
Tröllaborgir 20, niðurfelling á lóð
Lögð fram tillaga Borgarskipulags, dags. 02.10.96, að niðurfellingu lóðar nr. 20 við Tröllaborgir.

Samþykkt.
Bogfimivöllur, lóðarumsókn Íþróttafélags fatlaðra, lóð fyrir bogfimivöll
Lagt fram bréf Dagnýjar Bjarnadóttur, f.h. Landslagsarkitekta, dags. 01.10.96, varðandi beiðni Íþróttafélags fatlaðra um staðsetningu bogfimivallar norðan við Stekkjarbakka, samkv. uppdr. dags. 18.09.96.

Skipulagsnefnd samþykkir erindið fyrir sitt leyti, en bendir á að þar sem um er að ræða borgarverndað svæði verða gerðar ríkar kröfur um útfærslu og m.a. verða ekki heimilaðar auglýsingar af neinu tagi á svæðinu. Vísað til umhverfismálaráðs.
Þingás 8, afnotaréttur á borgarlandi
Lagt fram bréf Hjördísar Harðardóttur og Arnar Sveinssonar, dags. 18.07.96, varðandi ósk um breytingar á mörkum leigulóðar að Þingási 8. Einnig lagður fram uppdr. Borgarskipulags, dags. 25.09.96.

Samþykkt. Vísað til umhverfismálaráðs.