Aðalskipulag Reykjavíkur, Bíla má hvíla, Efstaleiti 5, Fjallkonuvegur, Guðbrandsgata, Hraunbær 107, Kaplaskjólsvegur, Kirkjusandur, Laugardalur, skautasvell, Laugavegur 86 og 86b, Miðborgin, Skólavörðustígur 45, Skúlagata 21 og 42, Síðumúli 28, Vatnsmýrarvegur 9, Vatnsstígur 3, Aðalskipulag Reykjavíkur, Ánanaust, umferðarskipulag, Ánanaust/söluskáli/Akið-takið, Ártúnsbrekka, jarðhýsi, Öryggismiðstöð Íslands, Barónsstígur 2-4,

Skipulags- og umferðarnefnd

2. fundur 1997
Ár 1997, mánudaginn 27. janúar kl. 10:00, var haldinn 2. fundur skipulags- og umferðarnefndar í Borgartúni 3, 4. hæð. Þessir sátu fundinn: Guðrún Ágústsdóttir, Margrét Sæmundsdóttir, Óskar Dýrmundur Ólafsson, Guðrún Jónsdóttir, Gunnar Jóhann Birgisson og Halldór Guðmundsson. Fundarritari var Guðný Aðalsteinsdóttir.
Þetta gerðist:

Aðalskipulag Reykjavíkur,
Lagt fram handrit að greinargerð, dags. 22.01.97 og landnotkunarkort, dags. 22.1.97. dags. 22.01.97. Einnig yfirlit yfir skipulagstölur og umferðarspá fyrir höfuðborgarsvæðið, dags. 17.1.97, yfirlit yfir helstu ábendingar frá nefndum og ráðum um greinargerð AR 1996 og breytingar á landnotkunarkorti AR 1996.

Lögð fram breytingartillaga fulltrúa Sjálfstæðisflokksins á drögum að AR 1996-2016:
"Skipulags- og umferðarnefnd samþykkir að Geldinganesið verði íbúðasvæði og að í greinargerð með aðalskipulagi komi fram að Geldinganesið verði skipulagt með hliðsjón af tillögum þeim, sem verðlaun hlutu í samkeppni sem fram fór um skipulag svæðisins fyrir nokkrum árum síðan. Samþykkt þessi felur í sér að fallið er frá hugmyndum um að Geldinganesið geti byggst upp sem athafnasvæði. Í samræmi við samþykkt þessa verður þeim köflum í greinargerð með aðalskipulagi Reykjavíkur, sem fjalla um Geldinganesið sem framtíðar athafnasvæði, breytt eða lagfærðir. Jafnframt verður landnotkunarkorti breytt til samræmis við þessa samþykkt og hafnarsvæði sem þar er sýnt í Eiðsvík minnkað þannig að það verði ekki stærra en núgildandi aðalskipulag gerir ráð fyrir. Jafnframt felur þessi samþykkt í sér að Sundabraut verði færð í fyrra horf en skeri nesið ekki sundur eins og nýjasta tillagan að landnotkunarkorti gerir ráð fyrir.
Greinargerð:
Geldinganesið er án efa eitt besta byggingarland sem eftir er innan landamarka Reykjavíkur. Svæðið er fallegt, liggur vel við öðrum íbúðahverfum og hefur marga aðra kosti, sem rækilega er lýst í forsendum að niðurstöðum dómnefndar í samkeppni þeirri um skipulag svæðisins sem áður er vitnað til. Hvort sem litið er til samgangna, orkuöflunar eða legu lands er ekki hægt að fullyrða að Geldinganesið hafi margt umfram aðra kosti sem til greina koma sem framtíðar athafna- eða iðnaðarsvæði Reykjavíkur. Sérstaklega þegar haft er í huga að með auknu samstarfi Reykjavíkur og Hafnarfjarðarbæjar opnast margir nýir möguleikar fyrir bæði sveitarfélögin. Það er ábyrgðarhluti að gera áætlanir um að byggja upp athafnasvæði fyrir stór iðnfyrirtæki nánast í bakgarði þeirra Reykvíkinga, sem hafa keypt sér íbúðalóðir á Grafarvogssvæðinu, margir hverjir í trausti þess að á Geldinganesinu verði íbúðabyggð."
Breytingartillagan felld með 4 atkvæðum gegn 2.
Lögð fram tillaga fulltrúa Sjálfstæðisfl. um frestun á afgreiðslu AR 1996-2016.
Lögð fram frávísunartillaga fulltrúa Reykjavíkurlistans á frestunartillögu fulltrúa Sjálfst.fl.
Samþykkt með 4 atkv. gegn 2.
Landnotkunarkort og greinargerð AR 1996-2016, samþykkt með 4 atkvæðum gegn 2.

Skýrslu um skipulag Miklubrautar frestað og kaflanum um loft- og hávaðamengun vísað til heilbrigðisnefndar.

Eftirfarandi bókun fulltrúa Reykjavíkurlistans lögð fram:
"Eins og fram kemur í inngangi greinargerðar AR 1996-2016 er í þessari skipulagsáætlun lögð áhersla á að sveigja skipulagið svo sem frekast er kostur að þeim alþjóðlegu samningum sem Ísland er aðili að á sviði umhverfismála. Þetta leiðir m.a. til breyttra áherslna í umferðarmálum. Gengið er út frá því í áætluninni að dregið sé úr forgangi einkabílaumferðar gagnvart almenningssamgöngum og hjólandi- og gangandi umferð. Kannanir sýna að umferð einkabíla hér í borg er á við það sem gerist í 300.000 manna bæjum í nágrannalöndunum. Ástæður til þessa eru margslungnar og ljóst að leita þarf fjölþættra leiða ef takast á að breyta þessari mynd. Á hitt ber að líta að mengun sem af bílaumferð stafar er orðin veruleg í Reykjavík bæði hvað snertir hávaða- og loftmengun. Óhöpp og slys af völdum umferðar eru mörg, sársaukafull og dýr samfélaginu.
Það er ekki á færi Reykjavíkurborgar einnar að glíma við þessi vandamál þótt viljinn sé fyrir hendi. Hér þarf að koma til samstillt átak ríkis, borgar og fólksins sjálfs, sem borgina byggir.
Lífsvenjur fólks breytast ekki í einni svipan. Hins vegar teljum við að okkur beri skylda til að stíga fyrstu skrefin í átt til þess að sporna við óheftri aukningu einkabílaumferðar í borginni. Þess vegna er í þessu aðalskipulagi aðeins gert ráð fyrir tiltölulega lítilli aukningu á umferðarrýmd vestan Elliðaáa. Við leggjum hins vegar áherslu á að aðalgatnakerfið verði lagfært til muna í því skyni að fækka umferðarslysum og draga úr mengun. Í nánum tengslum við afgreiðslu Aðalskipulags Reykjavíkur 1996-2016 og fyrir vorið 1997 verður lokið við gerð og samþykkt áætlun um 20% fækkun slysa af völdum umferðar í Reykjavík. Á sama hátt verður unnið að áætlun um úrbætur í sambandi við hávaða- og loftmengun í borginni fyrir aldamót. "

Eftirfarandi bókun fulltrúa Sjálfstæðisflokksins lögð fram:
"Borgarfulltrúar Sjálfstæðisflokksins eru mótfallnir þeirri tillögu sem fulltrúar R-listans hafa lagt fram í skipulags- og umferðarnefnd um uppbyggingu Miklubrautar sem er meginumferðaræðin í gatnakerfi Reykjavíkurborgar. Það er til marks um hve tillaga R-listans hvílir á veikum grunni að allir fulltrúar hans í skipulags- og umferðarnefnd kynntu í upphafi sérstakar bókanir, sem eru í mótsögn við það sem þeir leggja til að gert verði. Sérstaklega virðast þeir eiga erfitt með að gera upp við sig hvort gatnamót við Kringlumýrarbraut verði ljósastýrð eða mislæg. Sjálfstæðismenn leggja til að valinn verði svokallaður valkostur II, sem er arðbærasti valkosturinn, með þeirri breytingu þó að Miklubrautin verði ekki lögð í röri eða stokk vestast en að gatnamót við Kringlumýrarbraut og Skeiðarvog verði mislæg.
Mislæg gatnamót eru besti kosturinn þegar tekið er tillit til umferðaröryggis. Þjónustustig á gatnamótum Miklubrautar og Kringlumýrarbrautar er óviðunandi miðað við núverandi umferð og mun fara versnandi þegar umferð vex. Verði þjónustustig þessara gatnamóta ekki aukið mun umferð leita annað og þá inn í nærliggjandi íbúðarhverfi. Tillaga sem felur slíkt í sér er óásættanleg.
Lagning Miklubrautar í stokk eða rör frá Stakkahlíð eða frá Reykjahlíð og að Snorrabraut dregur úr hávaða og loftmengun við götuna. Það er þó hætt við að þótt slíkar tillögur leysi sum vandamál að þá verði önnur til í staðinn. Verði gatan lögð í stokk frá Stakkahlíð mun aðgengi að Hlíðunum versna og umferð flytjast á íbúðargötur og draga úr umferðaröryggi inni í hverfunum. Stuttur stokkur eða rör frá Reykjahlíð leysi einungis mengunarvandamál fyrir örfáa og hætt er við að vandamálin er rörið skapaði yrðu mun meiri. Taka þarf Miklubrautina niður löngu áður en hún rennur í rörið og því yrði mynduð gjá við Miklatún. Slík lausn fer illa í landinu og aðgengi að Miklatúni versnar. Leita þarf annara lausna til þess að leysa mengunarvandamál við Miklubraut hvort sem slikar lausnir fela í sér að Reykjavíkurborg þurfi að kaupa upp stóran hluta þeirra íbúða sem að götunni liggja eða ekki.
Að lokum telja borgarfulltrúar Sjálfstæðisflokksins ekki ásættanlegt að taka ákvörðun í þessu mikilvæga máli fyrr en endanlegar upplýsingar eða útreikningar liggja fyrir frá borgarverkfræðingi um hversu mikill munur er á umferðaröryggi eftir því hvaða lausn eða tillaga verður fyrir valinu."

Bókun fulltrúa Sjálfstæðisflokksins:
"Sú breyting sem m.a. er gerð á aðalskipulaginu, að hætta við lagningu Hlíðarfóts hlýtur að vera mjög vafasöm m.t.t. heildarskipulags gatnakerfis borgarinnar og samþykkts deiliskipulags af flugvellinum, sem gerir ráð fyrir Hlíðarfæti sem einni aðalaðkomuleiðinni að fyrirhugaðri flugstöð Reykjavíkurflugvallar. Það er augljóst að þó að Hlíðarfótur tengist ekki fyrirhugaðri Fossvogsbraut þá myndi hann létta á umferð á leið til Garðabæjar og Hafnarfjarðar, úr mið- og vesturbæ Reykjavíkur. Í stað þess er þessari umferð beint í gegnum íbúðarhverfi með tilheyrandi slysahættu, hávaða og loftmengun fyrir íbúa þessara hverfa.
Afleiðing þess að hætta við lagningu Hlíðarfóts hlýtur m.a. að vera sú að finna verður nýrri flugstöð og þjónustubyggingum tengdum henni nýja staðsetningu. Kynnt hefur verið tillaga um flutning flugstöðvar nær miðborg Reykjavíkur, slíkar hugmyndir eru algjörlega í mótsögn við yfirlýsta stefnu R-listans varðandi umhverfismál, mikil umsvif tengjast ætíð flugstöðvum og þeim fylgir umferð bæði flugvéla og bíla með tilheyrandi hávaða og mengun.
Staðsetning nær miðborginni gæti verið mjög afdrifarík fyrir nærliggjandi íbúðabyggð og stærstu sjúkrastofnun landsins sem er í næsta nágrenni. Ríkjandi vindáttir gera það einnig að verkum að hávaði og mengun berast auðveldlega yfir miðbæ Reykjavíkur við þessa staðsetningu flugstöðvar. Við ákvörðun þeirrar staðsetningar flugstöðvar, sem núverandi deiliskipulag gerir ráð fyrir við Hlíðarfót var m.a. gert ráð fyrir sem minnstri truflun fyrir borgarbúa af rekstri flugstöðvar hvað umhverfismengun varðar.
Í drögum að aðalskipulagi stendur að Reykjavíkurflugvöllur skuli verða örugg miðstöð fyrir áætlanaflug innanlands. Þær tillögur sem hafa verið uppi, um að leggja braut 0725 niður er í mikilli mótsögn við allt tal um öruggt innanlandsflug, því með þeirri ákvörðun fækkkar mögulegum flugrekstrardögum um allt að 10-15 daga á ári.
Við lýsum okkur mótfallna því að aðalskipulag Reykjavíkur sé vísað til borgarráðs fyrr en fyrir liggur skýrsla um hagkvæmni Reykjavíkurflugvallar sem hefur verið í vinnslu undanfarið. Niðurstöður þessarar skýrslu sem kynna á einhverja næstu daga hljóta að vera forsendur áframhaldandi vinnu við skipulag flugvallarins."

Bókun meirihluta skipulags- og umferðarnefndar vegna bókunar minnihluta varðandi AR 1996 - 2016.
I. Tillaga okkar varðandi útfærslu á Miklubraut í AR er byggð á skýrslu og mjög nákvæmri úttekt á Miklubraut sem unnin er í samræmi við sambærilegar forsendur í umferðarskipulagi og verið hefur, þó með þeirri undantekningu að kostnaður vegna slysa hefur verið þrefaldaður til samræmis við nýja staðla sbr. staðla í nágrannalöndum okkar og nýlegum útreikningum Hagfræðistofnun H.Í.
Það liggur því fyrir hversu mikill munur er á umferðaröryggi eftir því hvort gatnamót eru mislæg eða í "plani".
Mislæg gatnamót inni í íbúðarhverfum í nágrenni miðbæjar eru ákaflega vandleyst sérstaklega hvað varðar umhverfissjónarmið. Þau hljóta að vega þungt í afstöðu okkar, sérstaklega þegar fram kemur að lítill munur er á umferðaröryggi í lausnum I og II. Að auki má benda á að uppsetning rauðaksturs myndavéla á þessum gatnamótum sem talið er geta fækkað slysum um þriðjung. Þessi ljós verða tekin í notkun nú í vikunni. Kostnaðarmismunur á útfærslu I og II nemur milli 400 og 500 millj. króna sem hlýtur ennfremur að hafa áhrif á niðurstöðu okkar.

II. Varðandi lagningu Miklubrautar í stokk að vestanverðu er veruleg bót fyrir þau hús sem nú búa við mestu loft og hávaðamengun og eykur til muna aðgengi að útivistarsvæðinu á Miklatúni, ekki einungis fyrir næsta nágrenni heldur fyrir allt íbúðasvæðið. Skv. tillögunni verður til grænt svæði þar sem nú er stór og fjölfarin umferðaræð. Nánari útfærsla á þessum göngum bíður svo deiliskipulags sem unnið verður í samráði við íbúa.

III. Það er á misskilningi byggt að bíða þurfi eftir skýrslu um Reykjavíkurflugvöll sem nú er verið að vinna í samræmi við yfirvöld flugmála. Sú skýrsla er undirbúningur undir fyrirhugaðar endurbætur á flugbrautum og flughlöðum og umfangsmiklum jarðvegsskiptum sem þeim fylgir. Niðurstaða þeirrar vinnu og þess umhverfismats sem ráðist verður í í kjölfarið geta kallað á endurskoðun deiliskipulags flugvallarins frá 1986, ekki síst ef sú ákvörðun verður tekin að fella niður flugbraut 07-25 sem er veikasti hlekkurinn í öryggi flugvallarins, enda er sú braut ekki nýtt nema í algjörum undantekningartilvikum (sjá áhættumatsskýrslu samgönguráðuneytisins frá 1991).
Vísað er á bug fullyrðingum um að niðurlagning Hlíðarfótar sé í mótsögn við yfirlýsta stefnu Reykjvíkurlistans í umhverfismálum. Hlíðarfótur eins og hann var fyrirhugaður sker í sundur mikilvæg útivistarsvæði þ.e. tengsl Öskjuhlíðar og Nauthólsvíkur, en Nauthólsvíkursvæðið mun fljótlega gegna mun meira hlutverki nú þegar framsækin stefna Reykjavíkurlistans í holræsamálum fer að skila árangri. Hlíðarfóturinn kom jafnframt í veg fyrir að hægt væri að vernda og friðlýsa Fossvogsbakka sem eru mikilvægar náttúruminjar.
Aðkoma að nýrri flugstöð er ágætlega tryggð eftir núverandi gatnakerfi. Vísað er til hugmynda sem embættismenn vörpuðu fram um möguleika á nýrri staðsetningu flugstöðvar og dregnar af honum ályktanir. Slíkt er engan veginn tímabært og er því ekki svara vert.
Varðandi Geldinganesið vísum við til greinargerða með aðalskipulagi bls. 29 en þar kemur fram að þegar til framtíðar er litið er "Geldinganes - Eiðsvík besti kosturinn til að byggja upp stórt samfellt athafnahverfi og þjónustu í tengslum við flutninga- og iðnaðarhöfn og þjóðbraut til og frá borginni". Hvergi annars staðar er að finna 10 ha. eða stærri lóðir í tengslum við höfn. Það er því nauðsynlegt að taka nesið frá til að geta brugðist við og nýtt sóknarfæri í atvinnuuppbyggingu í borginni. Að sjálfsögðu þarf athafnastarfsemi á svæðinu að samrýmast ströngum kröfum um umhverfisvernd. Það er fráleitt að vísa umsóknum um stórar atvinnulóðir til Hafnarfjarðar. Gert er ráð fyrir íbúðahverfi á austasta hluta nessins og flutningi Kleppsvíkurtengingar frá íbúðahverfinu í Borgarholti sem bætir mjög umhverfi við Leirvoginn.
Í þessu aðalskipulagi er lögð áhersla á að styrkja samspil borgar og náttúrulegs umhverfis í samræmi við stefnu Reykjavíkurlistans, sem telur að umhverfismálin séu mikilvægasti málaflokkur framtíðar. "

Bíla má hvíla,
Lögð fram tillaga að framhaldi verkefnisins Bíla má hvíla.

Áframhaldandi vinnsla verkefnisins samþykkt.
Efstaleiti 5,
Lagt fram bréf Gísla Þórs Gíslasonar, Guðlaugs Einarssonar og Jakobs Hafstein, dags. 05.11.96, varðandi umferðarþunga vegna fyrirhugaðra bygginga við Efstaleiti 3, 5, 7 og 9 við Efstaleiti. Ennfremur að lóð nr. 5 við Efstaleiti verði ekki byggingarlóð í framtíðinni.
Vísað til Borgarskipulags og umferðardeildar.
Fjallkonuvegur, hraðahindrun, grindverk
Lagt fram bréf Ragnars Gíslasonar skólastjóra Foldaskóla, dags. 29.11.96, varðandi hraðahindrun á Fjallkonuvegi.

Vísað til Borgarskipulags, hverfakortsvinnu og umferðardeildar.
Guðbrandsgata, biðskylda
Lagt fram bréf Konráðs Guðmundssonar framkv.stj., Hótel Sögu, dags. 30.10.96, varðandi umferð á Guðbrandsgötu/Arngrímsgötu. Einnig umsögn umferðardeildar, dags. 24.01.97.

Umsögn umferðardeildar samþykkt.
Hraunbær 107, lóðarafmörkun og skilmálar
Lögð fram tillaga Borgarskipulags að lóðarafmörkun og skilmálum, dags. 19.11.96. Ennfremur lagt fram að nýju bréf borgarstjóra, f.h. borgarráðs, dags. 25.09.96, varðandi bréf skrifst.stj. borgarverkfræðings, dags. 23.09.96, um fyrirheit á úthlutun lóðar nr. 107 við Hraunbæ. Einnig lagt fram bréf lóðarumsækjenda, Magnúsar Sigurðssonar og Arnars Sigurðssonar, dags. 15.10.96. Engar athugasemdir bárust við kynningu. Einnig lögð fram tillaga Manfreðs Vilhjálmssonar að uppbyggingu á lóð, dags. 22.01.97.
Samþykkt.
Kaplaskjólsvegur, umferð
Lagt fram bréf Guðrúnar Þorsteinsdóttur, Kaplaskjólsvegi 33A, dags. 18.11.96, varðandi umferðarhraða og umferðarþunga á Kaplaskjólsvegi.

Vísað til umferðardeildar og Borgarskipulags.
Kirkjusandur, aðkoma að Íslandsbanka
Lagt fram bréf Valdimars Harðarsonar ark., dags. 30.09.96, varðandi aðkomu að Kirkjusandi 2 og bréf Íslandsbanka, dags. 30.10.95.

Vísað til Borgarskipulags og umferðardeildar.
Laugardalur, skautasvell, yfirbygging
Lagt fram bréf Þormóðs Sveinssonar f.h. byggingarnefndar Íþróttabandalags Reykjavíkur, dags. 22.01.97, varðandi ósk um að kynna drög að forsögn v/yfirbyggingar skautasvells í Laugardal.

Þormóður Sveinsson kynnti.
Frestað og vísað til umhverfismálaráðs og Borgarskipulags til frekari skoðunar.
Laugavegur 86 og 86b, endurbygging
Lagt fram að nýju bréf Guðna Pálssonar f.h. Helga Geirssonar, dags. 19.06.96, varðandi niðurrif á húsum við Laugaveg 86 og 86b og endurbyggingu á lóðinni, samkv. uppdr., dags. 19.06.96. Einnig lögð fram umsögn Borgarskipulags dags. 19.07.96, bréf Árbæjarsafns dags. 09.07.96 og umsögn umhverfismálaráðs, dags. 06.09.96. Ennfremur lagt fram bréf Guðna Pálssonar f.h. eigenda Laugavegs 86 og 86b, dags. 17.01.97, varðandi uppbyggingu á lóðinni samkv. uppdr. dags. 20.01.97. Einnig lögð fram umsögn Borgarskipulags, dags. 25.01.97.
Umsögnin samþykkt með 5 atkv. Guðrún Jónsdóttir sat hjá.
Miðborgin, stæði leigubíla
Lagt fram bréf Bifreiðastjórafélagsins Frama, dags. 05.11.96, varðandi umferð í miðbænum.

Vísað í miðborgarvinnu.
Skólavörðustígur 45, viðbygging
Lagt fram bréf byggingarfulltrúa, dags. 03.01.97, varðandi viðbyggingu við hótelið, samkv. uppdr. ark. Hjördísar og Dennis, dags. í des. 1996.

Samþykkt.
Skúlagata 21 og 42, uppbygging
Lagt fram að nýju bréf Ólafar Flygenring arkitekts f.h. Viðars ehf., dags. 06.11.96, varðandi uppbyggingu lóðanna Skúlagötu 21 og 42. Einnig lagt fram bréf Almennu verkfræðistofunnar hf., dags. 28.10.96, varðandi umferðarhávaða. Ennfremur lagðir fram uppdr. arkitektanna Ólafar Flygenring, Ævars Harðarssonar og Jóns Nordstien, dags. 21.01.97 ásamt líkani og mat umferðardeildar á hljóðvistarskýrslu, dags. 21.01.97 og bréf G.Á.J. Lögfræðist. f.h. Íslandsbanka, dags. 27.1.97.
Framlögð tillaga ásamt eftirfarandi bókun samþykkt:
"Þar sem skipulagið er staðfest árið 1986 áður en hljóðvistarákvæði voru sett í byggingar- og mengunarvarnareglugerðir, verður að líta svo á að reglur um hljóðstig gildi skv. skipulagi, hér sé hvorki um nýskipulag að ræða né endurnýjun byggðar sem fyrir er sambr. bréf borgarlögmanns dags. í sept. 1996 vegna Skúlagötu 20. Hljóðvistarskýrsla Almennu Verkfræðistofunnar leiðir í ljós að hljóðstig við húshlið er snýr að Snorrabraut er mest 65,3 dB. Samkvæmt spá umferðardeildar Borgarverkfræðings fyrir árið 2009 verður mesta hljóðstig við húshlið 67-68 dB. Taka þarf mið af því við hönnun húss, þannig að helstu vistarverur íbúða opnist að inngarði frá Snorrabraut. Gætt verður ýtrustu krafna gildandi reglugerða um hljóðvist innanhúss og á leik- og dvalarsvæði. Nýtingarhlutfall á lóðinni er innan marka staðfests skipulags og einnig á hvorri lóð fyrir sig ef markaðar eru sér lóðir. Ekki er lagst gegn því að leyft verði 1 stæði á íbúð á lóð þar sem eftir talin atriði mæla með því: Samnýting bílastæða er möguleg, opin stæði á lóð skrifstofubyggingar geta nýst sem gestastæði á kvöldin og um helgar. Lóðin er miðsvæðis og í nálægð við miðstöð strætisvagna. Fordæmi eru við Skúlagata 10, Klapparstígur 1-7 (Völundarlóð), Skúlagata 20 (íbúðir aldraðra) og Egilsborgir við Rauðarárstíg. Í ljósi breyttra áherslna í umferðarmálum, þar sem áhersla er lögð á bættar almenningssamgöngur og að spornað sé gegn óheftri aukningu einkabíla, verði bílastæðareglur endurskoðaðar. Kvöð verði lögð á lóðina um gangandi umferð, austur vestur, í framhaldi Skúlagötu. Nánari útfærsla byggingar verði unnin í samráði við Borgarskipulag."
Síðumúli 28, verslunar- og þjónustuhús
Lagt fram bréf Ásgeirs Ásgeirssonar f.h. Teiknistofunnar h.f. Ármúla 6, dags. 03.01.97, varðandi nýtt verslunar- og þjónustuhús að Síðumúla 28, samkv. uppdr. Teiknist. h.f. Ármúla 6, dags. 03.12.96, breytt 02.01.97.

Samþykkt.
Vatnsmýrarvegur 9, færsla á byggingarreit, aðkoma
Lögð fram bréf Einars Eiríkssonar og Kristins Ragnarssonar, dags. 21.10 og 11.11.96, varðandi lóðarstækkun og færslu á byggingarreit samkv. uppdr. Teiknistofunnar Smiðjuvegi 11E, dags. 16.10.96 og 29.11.96. Einnig lögð fram umsögn Borgarskipulags, dags. 14.01.97, ásamt umsögn umferðardeildar, dags. 21.01.97.
Synjað með tilvísun í umsögn Borgarskipulags.
Vatnsstígur 3, bílastæði
Lagt fram bréf Guðrúnar Birnu Eiríksdóttur, f.h. Heildverslunar Eiríks Ketilssonar, dags. 22.10.96, varðandi bílastæði við Vatnsstíg 3.

Vísað til Borgarskipulags og umferðardeildar.
Aðalskipulag Reykjavíkur,
Formaður skipulags- og umferðarnefndar lagði fram eftirfarandi tillögu:
"Vegna umræðna á fundi skipulags- og umferðarnefndar 27. jan. um umferðarþátt AR leggur nefndin áherslu á að við hönnun Kleppsvíkurtengsla og endurbóta á Sæbraut verði tekið fullt tillit til stefnumörkunar nefndarinnar um að sporna eins og kostur er gegn óheftri aukningu umferðar á Miklubraut."
Samþykkt með 4 samhlj. atkvæðum. Fulltrúar Sjálfstæðisflokks sátu hjá.
Ánanaust, umferðarskipulag, umferðartalning
Lögð fram tillaga borgarverkfræðings að umferðaskipulagi Ánanausta.

Nefndin samþykkir skipulagið, en áhersla skal lögð á örugg göngutengsl við göngustíg meðfram sjó.
Vísað til umhverfismálaráðs hvað varðar göngustíga.
Ánanaust/söluskáli/Akið-takið, skipulag lóða
Lagt fram bréf Arkitekta Gunnars og Reynis s.f. dags. 15.01.97, varðandi lóðamörk söluskála og bensínstöðvar við Ánanaust, samkv. uppdr. Arkitekta Gunnars og Reynis s.f., dags.15.01.97, breytt 24.01.1997.

Samþykkt.
Ártúnsbrekka, jarðhýsi, breyting á húsi
Lagt fram bréf byggingarfulltrúa, f.h. byggingarnefndar, dags. 13.12.96, varðandi breytingu á húsi á lóð við Suðurlandsbraut samkv. meðf. uppdr. Pálmars Kristmundssonar arkitekts, dags. 21.11.96. Einnig lögð fram umsögn skrifst.stj. borgarverkfræðings, dags. 3. janúar 1997 samþykkt í borgarráði sama dag og bókun umhverfismálaráðs frá 7. janúar 1997 ásamt umsögn borgarminjavarðar, dags. 23.01.97.
Nefndin samþykkir erindið, en óskar eftir að fá að sjá útfærslu á aðkomuleið að húsunum, þar sem tekið er tillit til aðstæðna, þ.e. borgarverndað svæði. Einnig er tekið undir bókun umhverfismálaráðs, hvað varðar takmörkun á skiltum á svæðinu.
Öryggismiðstöð Íslands, útkallsbifreiðir
Lagt fram bréf Bergsteins R. Ísleifssonar framkv.stj., f.h. Öryggismiðstöðvar Íslands, dags. 26.11.96, varðandi heimild til að nota götur og beygjuheimildir merktar "aðeins fyrir SVR eða Taxa".

Synjað.
Barónsstígur 2-4, aðkoma
Lögð fram eftirfarandi bókun fulltrúa Sjálfstæðisflokks.:

"Á síðasta fundi borgarráðs samþykkti borgarráð að leyfa innkeyrslu frá Hverfisgötu inn á lóðina nr. 2-4 við Barónsstíg. Þessi samþykkt gengur þvert á fyrri samþykktir R-listans sem hingað til hefur af óskiljanlegum ástæðum staðið í vegi fyrir þessari breytingu. Þessi samþykkt borgarráðs er áfellisdómur yfir meirihluta R-listans og þá sérstaklega yfir fulltrúum R-listans í skipulagsnefnd. Spaugilegt er að meirihluti R-listans notaði tækifærið til þess að endurskoða ákvörðun sína þegar formaður skipulagsnefndar Guðrún Ágústsdóttir var erlendis, en eins og kunnugt er lagði hún mikla áherslu á að þessari ósk lóðarhafa yrði hafnað, bæði í skipulagsnefnd og síðar í borgarstjórn.
Málið er allt hið furðulegasta. Lóðarhafar sóttu um að fá að flytja innkeyrsluna inn á lóð sína, frá horni Barónsstígs og Hverfisgötu, inn á Hverfisgötuna. Þessi ósk þeirra fékk jákvæðar undirtektir starfsmanna borgarverkfræðings og umferðarnefndar. Meirihluti skipulagsnefndar var hins vegar í tæpa þrjá mánuði að gera upp hug sinn í málinu og tók loksins þá ákvörðun að hafna beiðni lóðarhafa. Borgarráð staðfesti þá ákvörðun og síðar borgarstjórn eftir miklar umræður. Nú hefur R-listinn loksins náð áttum í þessu máli og endurskoðað fyrri ákvörðun sína.
Það er stjórnsýsla af þessu tagi sem er til þess fallin að fæla fyrirtæki og byggingaraðila frá Reykjavík til nágrannasveitarfélaganna."

Bókun formanns skipulags- og umferðarnefndar:
"Vísað er á bug fullyrðingu um að fyrirtæki og byggingaraðilar leiti frekar til nágrannasveitarfélaga en Reykjavíkur. Staðreyndir sýna annað, bæði veruleg aukin eftirspurn eftir atvinnulóðum eftir langt stöðnunartímabil og eftirspurn eftir íbúðalóðum fer einnig vaxandi. Þetta má m.a. þakka góðri stjórnsýslu og sveigjanleika af hálfu núverandi meirihluta. Að öðru leyti er bókunin ekki svaraverð enda í þeim stíl sem of oft einkennir störf minnihlutans í borgarstjórn Reykjavíkur."