Skúlagata 12-16
Verknúmer : SN090025
63. fundur 2014
Skúlagata 12-16, sjónlína niður Frakkastíg
Lagt fram bréf Elínar Ebbu Ásmundsdóttur og Jons Kjell Seljeseth dags. 24. febrúar 2014 varðandi skerðingu útsýnis frá Skólavörðuholtinu niður Frakkastíg vegna fyrirhugaðra bygginga við Skúlagötu. Lagt fram minnisblað skipulagsfulltrúa og byggingarfulltrúa dags. 8. apríl 2014.
58. fundur 2014
Skúlagata 12-16, sjónlína niður Frakkastíg
Lagt fram bréf Elínar Ebbu Ásmundsdóttur og Jons Kjell Seljeseth dags. 24. febrúar 2014 varðandi skerðingu útsýnis frá Skólavörðuholtinu niður Frakkastíg vegna fyrirhugaðra bygginga við Skúlagötu.
Nikulás Úlfar Másson skrifstofustjóri sat fundinn undir þessum lið.
Farið yfir stöðu málsins.
Fulltrúar Besta flokksins Páll Hjaltason. Elsa Hrafnhildur Yeoman og Karl Sigurðsson og fulltrúar Samfylkingarinnar Hjálmar Sveinsson og Kristín Soffía Jónsdóttir og fulltrúi Vinstri hreyfingarinnar Græns framboðs Sóley Tómasdóttir bóka:
"Deiliskipulag Skuggahverfis er barn síns tíma. Það var samþykkt einróma í borgarstjórn árið 2006. Engar athugasemdir bárust frá borgarbúum. Síðan hefur mikið vatn runnið til sjávar.
Turninn sem nú rís við Skúlagötu á eftir að hafa áhrif á veðurfar, útsýni og ásýnd borgarinnar og mun skerða mikilvægan sjónás norður Frakkastíg. Turninn og reiturinn allur er almennt á skjön við umhverfis- og skipulagsáherslur í dag. Í aðalskipulagi Reykjavíkur 2010-2030 kemur fram skýr stefna þar sem tekið er tillit til fleiri þátta en áður, m.a. um hæðir húsa, um sjónása, verndun eldri byggðar og byggðarmynsturs. Það breytir þó ekki átta ára gamalli samþykkt, deiliskipulagið er í gildi og byggingarleyfi hafa verið gefin út.
Umhverfis- og skipulagsráð skorar á Alþingi Íslendinga að setja fyrningarákvæði í skipulagslög, þannig að hægt verði að endurskoða skipulagsáætlanir ef framkvæmdir hefjast ekki innan ákveðins tíma. Slíkt ákvæði myndi tryggja vandaðari skipulagsvinnu, skýrara umboð skipulagsyfirvalda á hverjum tíma og meiri sátt innan samfélagsins. Ráðið felur jafnframt skipulagsfulltrúa að hefja viðræður við verktaka og höfða til samvisku þeirra vegna framkominnar gagnrýni og breyttrar stefnu borgaryfirvalda frá þeim tíma sem skipulagið var samþykkt".
Fulltrúar Sjálfstæðisflokksins Júlíus Vífil Ingvarsson, Marta Guðjónsdóttir og Hildur Sverrisdóttir bóka:
"Uppbyggingarheimildir í Skuggahverfinu hafa tekið miklum breytingum frá því að fyrsta deiliskipulag reitsins var samþykkt árið 1986. Þá var gert ráð fyrir því að byggingar næst mikilvægum sjónásum eins og frá Skólavörðuholti niður Frakkastíg til sjávar væru lágreistar tveggja til fjögurra hæða byggingar sem tækju mið af yfirbragði eldri byggðar hverfisins. Hærri hús sem þá áttu að vera að hámarki 13 hæðir voru staðsettar inn á miðju reitsins en út til jaðranna lækkuðu hæðir húsa og skyggðu ekki á sjónása. Anda þessa deiliskipulags var síðan kollvarpað árið 2005 og 2006 undir stjórn R-listans sem gjörbreytti uppbyggingarheimildum, færðu byggingarreiti út að götu, juku við nýtingarhlutafall lóðarinnar og hækkuðu turna um sex hæðir.
Fulltrúar Sjálfstæðisflokks í umhverfis og skipulagsráði taka undir athugasemdir frá íbúum sem ráðinu hafa borist þar sem því er mótmælt að turn út við Frakkastíg skyggi á útsýni til sjávar og er mjög frekur í borgarlandinu. Á síðasta kjörtímabili fóru fulltrúar Sjálfstæðisflokks og Framsóknarflokks fram á það við fulltrúa lóðarhafa að turninn yrði færður innar á lóðina en á það var ekki fallist enda byggja lóðarhafar ákveðinn rétt á gildandi deiliskipulagi.
Tekið er undir áskorun til Alþingis að setja fyrningarákvæði í skipulagslög, þannig að hægt verði að endurskoða skipulagsáætlanir. Það er í samræmi við fyrri tilmæli borgarfulltrúa Sjálfstæðisflokks til stjórnvalda og löggjafans.
Deiliskipulag Skuggahverfis endurspeglar sjónarmið í skipulagsmálum sem hafa breyst mikið á undanförnum árum. Því var ekki mótmælt af borgarbúum á sínum tíma en víst má telja að viðbrögðin yrðu allt önnur nú.
249. fundur 2009
Skúlagata 12-16, sjónlína niður Frakkastíg
Á fundi skipulagsstjóra 23. janúar 2009 var lagt fram bréf Jon Kjell Seljeseth og Elínar Ebbu Ásmundsdóttur, dags. 22. desember 2008, varðandi skerðingu á sjónlínu frá Skólavörðuholti niður Frakkastíg vegna fyrirhugaðs háhýsis að Skúlagötu 12-16.
Vísað til skipulagsráðs.
162. fundur 2009
Skúlagata 12-16, sjónlína niður Frakkastíg
Á fundi skipulagsstjóra 23. janúar 2009 var lagt fram bréf Jon Kjell Seljeseth og Elínar Ebbu Ásmundsdóttur, dags. 22. desember 2008, varðandi skerðingu á sjónlínu frá Skólavörðuholti niður Frakkastíg vegna fyrirhugaðs háhýsis að Skúlagötu 12-16. Erindi var lagt fram að nýju á fund á skipulagsstjóra þann 30. janúar 2009 og vísað til skipulagsráðs.
Kynnt.
242. fundur 2009
Skúlagata 12-16, sjónlína niður Frakkastíg
Á fundi skipulagsstjóra 23. janúar 2009 var lagt fram bréf Jon Kjell Seljeseth og Elínar Ebbu Ásmundsdóttur, dags. 22. desember 2008, varðandi skerðingu á sjónlínu frá Skólavörðuholti niður Frakkasígs vegna fyrirhugaðs háhýsis að Skúlagötu 12-16.
Vísað til skipulagsráðs.
241. fundur 2009
Skúlagata 12-16, sjónlína niður Frakkastíg
Lagt fram bréf Jon Kjell Seljeseth og Elínar Ebbu Ásmundsdóttur, dags. 22. desember 2008, varðandi skerðingu á sjónlínu frá Skólavörðuholti niður Frakkasígs vegna fyrirhugaðs háhýsis að Skúlagötu 12-16
Vísað til umsagnar verkefnisstjóra miðborgar.