Hverfisskipulag, Háaleiti-Bústaðir 5.3 Bústaða- og Smáíbúðahverfi

Verknúmer : SN140160
68. fundur 2014
Hverfisskipulag, Háaleiti-Bústaðir 5.3 Bústaða- og Smáíbúðahverfi, skipulags- og matslýsing
Lagt fram bréf borgarstjóra dags. 5. maí 2014 vegna afgreiðslu borgarráðs frá 2. maí 2014 um að fella tillögu skipulagsfulltrúa að skipulags- og matslýsingu fyrir hverfi borgarinnar.


64. fundur 2014
Hverfisskipulag, Háaleiti-Bústaðir 5.3 Bústaða- og Smáíbúðahverfi, skipulags- og matslýsing
Lögð fram tillaga skipulagsfulltrúa að skipulags- og matslýsingu fyrir Háaleiti-Bústaði hverfi 5.3 Bústaða- og Smáíbúðahverfi dags. 1. apríl 2014.

Drög að greinargerð og skipulagsskilmálum dags. 1. apríl 2014.

Samþykkt með sex atkvæðum fulltrúa Besta flokksins Páls Hjaltasonar. Elsu Hrafnhildar Yeoman og Karls Sigurðssonar og fulltrúa Samfylkingarinnar Hjálmars Sveinssonar og Kristínar Soffíu Jónsdóttur og fulltrúa Vinstri hreyfingarinnar Græns framboðs Torfa Hjartarsonar að kynna framlagða skipulags- og matslýsinu með vísan til 3. mgr. 40. gr. skipulagslaga nr. 123/2010.
Fulltrúar Sjálfstæðisflokksins Júlíus Vífil Ingvarsson, Óttar Guðlaugsson og Marta Guðjónsdóttir greiddu atkvæði á móti tillögunni og bókuðu:
" Í matslýsingum er lýst áherslum og stefnum í skipulagsmálum sem verða grunnur að þeim hverfisskipulagsáætlunum sem nú eru í vinnslu. Við erum ósammála mörgum af þeim tillögum sem fram koma í matslýsingum. Við teljum að víða sé gengið á rétt borgarbúa og að margar hugmyndir um uppbyggingu í grónum hverfum ýti undir réttaróöryggi í skipulagsmálum. Margt af því sem sett er fram í lýsingunum er í beinu ósamræmi við hugmyndir sem borgarbúar settu fram á íbúafundum.
Tillögur að breytingum á umferðarskipulagi byggja ekki á umferðartalningu eða umferðarlíkönum né heldur umferðaröryggismati og þeirri hættu sem tillögur geta leitt til í íbúðahverfum.
Með tilliti til þess hversu matslýsingar boða miklar breytingar á gildandi deiliskipulagsáætlunum og óvænta stefnu á óskipulögðum reitum víða um borgina er mikilvægt að kynningar matslýsinganna verði ítarlegar og að íbúum í grennd við fyrirhugaða uppbyggingu samkvæmt þeim verði sendir uppdrættir og skýringar. Það á einnig við þar sem stefnt er að breytingum í nærumhverfinu
Meginregla skipulagslaga er að afmörkuð svæði og reitir innan borgarmarkanna skuli deiliskipuleggja. Í deiliskipulagi eru teknar ákvarðanir um lóðir, lóðanotkun, byggingarreiti, byggðamynstur þ.m.t. nýtingarhlutfall, útlit mannvirkja og form. Heimilt er að víkja frá kröfum um framsetningu sem gerðar eru til deiliskipulagsáætlana og leggja áherslu yfirbragð og varðveislugildi með hverfisskipulagi. Heimild í skipulagslögum til að fara hverfisskipulagsleiðina verður að skoða sem undantekningarákvæði. Ekki er hægt að fallast á að mjög róttækar og stórtækar tillögur um uppbyggingu sem settar eru fram í lýsingum á hverfisskipulagsáætlunum í stað þess að fara deiliskipulagsleiðina sem er vandaðri málsmeðferð og mikil reynsla er komin á. Nokkra eldri hverfishluta borgarinnar getur verið upplagt að hverfisskipuleggja í stað þess að deiliskipuleggja en alls ekki öll hverfin eins og hér er lagt til. Auk þess er varasamt að hverfisskipuleggja alla borgina og fella úr gildi allar gildandi deiliskipulagsáætlanir án þess að hafa neina reynslu af því skipulagsformi til að byggja á. "

Fulltrúar Besta flokksins Páll Hjaltason. Elsa Hrafnhildur Yeoman og Karl Sigurðsson og fulltrúar Samfylkingarinnar Hjálmar Sveinsson og Kristín Soffía Jónsdóttir bókuðu."Hverfisskipulagið byggir á nýsamþykktu aðalskipulagi Reykjavíkur. Markmið hverfisskipulagsins er að leggja grunn að vistvænum og sjálfbærum hverfum í borginni íbúunum til hagsbóta. Rauður þráður í hverfisskipulaginu er að efla þjónustu og verslun í hverfunum. Með hverfisskipulaginu verður þar að auki til heildarskipulag fyrir öll hverfi borgarinnar með að það leiðarljósi að sameina gildandi deiliskipulagsáætlanir og skilmála fyrir viðkomandi hverfi í eina skipulagsáætlun. Það mun einfalda skipulagsyfirvöldum að fylgja eftir skipulagsáætlunum og borgarbúum verður um leið gert einfaldara fyrir að sækja um breytingar á eigin húsnæði innan ramma almennra byggingar- og skipulagsskilmála viðkomandi hverfis án þess að þurfa að fara í kostnaðarsamar breytingar á skipulagi. Mikil vinna hefur verið lögð í hverfisskipulagið undanfarin ár. Að því verki hafa meðal annars komið átta teymi arkitekta, skipulagsfræðinga og álitsgjafa. Haldnir hafa verið vinnu og kynningarfundir með íbúum í öllum hverfum borgarinnar í tvígang. Þær skipulags- og matslýsingar sem nú liggja fyrir eru afurð allrar þessarar vinnu og samráðs. Skipulagslýsingin gengur á engan hátt á rétt borgarbúa. Raunar er ein meginhugmynd hverfisskipulagsins að auka þátttöku íbúanna í skipulagi síns nærumhverfis. Náið samráð við íbúa verður ráðandi þáttur í hverfisskipulagsvinnunni í næsta áfanga verkefnisins."
Fulltrúi Vinstri hreyfingarinnar Græns framboðs Torfi Hjartarson bókaði:" Fulltrúi VG í umhverfis- og skipulagsráði fagnar þeirri yfirsýn og samfellu sem næst með nýrri nálgun í skipulagsvinnu fólginni í þróunarstarfi um hverfaskipulag á grundvelli skipulagslaga frá árinu 2010. Hugmyndir í skipulags- og matslýsingum á svæðum borgarinnar sem nú er ætlunin að skoða frekar sýna vel kostina fólgna í því að fylgja eftir nýju aðalskipulagi á þennan hátt. Um leið og þessu er fagnað er rétt að setja almenna fyrirvara um vönduð og lýðræðisleg vinnubrögð í framhaldi og frekari þróun hugmynda. Sérstaka varfærni þarf að sýna gagnvart grænum svæðum og náttúrulegu umhverfi í borginni. Mikilvægt er að endurheimta götur sem dreifa umferð, þétta byggð að hraðbrautum og efla mannlíf við borgargötur eins og lagt er upp með í lýsingunum og aðalskipulagi. Hvað snertir stokka eða mislæga umferð lýsir fulltrúi VG þeirri almennu afstöðu að heppilegra sé að hægja á umferð, með gatnamótum í plani og öflugum göngutengingum á milli svæða"
Vísað til borgarráðs.

63. fundur 2014
Hverfisskipulag, Háaleiti-Bústaðir 5.3 Bústaða- og Smáíbúðahverfi, skipulags- og matslýsing
Lögð fram tillaga skipulagsfulltrúa að skipulags- og matslýsingu fyrir Háaleiti-Bústaði hverfi 5.3 Bústaða- og Smáíbúðahverfi dags. 1. apríl 2014.

Lilja Grétarsdóttir verkefnisstjóri tekur sæti á fundinum undir þessum lið.
Kynnt.
Frestað.